सम्राटलाई  छिमेकी रमेश घिमिरेले चलाएको मोटरसाइकलले घरनजिकैको सडकमा ठक्कर दिँदा घटनास्थलमै मृत्यु भएको थियो। गत ३ मंसिर भएको दुर्घटनामा मृतक बालकले ज्यान गुमाएका थिए । मृतक परिवार, छरछिमेक तथा मावली र आफन्तले बिहीबार न्याय दिनुपर्ने निकायले मुद्दामा विपक्षीलाई उन्मुक्ति दिएको भन्दै विरोध जनाएका हुन्। 

जिल्ला अदालत रौतहटमा मृतकका बावु सन्तोष तिमल्सिनाले गत मंसिर २९ गते चालक रमेश घिमिरेलाई प्रतिवादी बनाई सवारी ज्यान मुद्दा दर्ता गरेका थिए। मोटरसाइकल चालक घिमिरे सँग सवारी चालक अनुमतिपत्र समेत नरहेको प्रहरीको प्रतिबेदनमा समेत उल्लेख छ । उक्त मुद्दामाथि जिल्ला अदालत, रौतहट गौरले गएको जेठ ३० गते फैसला गरेको थियो। जिल्ला न्यायाधीश गेहेन्द्रराज पन्तको इजलासले आंशिक अभियोग दाबी पुग्ने भन्दै फैसला सुनाएको थियो। प्रतिवादी घिमिरे ६ महिना जेल सजाय तथा दुई हजार रुपैयाँ बुझाएर थुनामुक्त भएका थिए।

सवारी तथा यातायात व्यवस्था ऐन, २०४९ मा व्यवस्था भएअनुसार दफा १६१ (१)मा पाँच वर्षदेखि १२ वर्षसम्म कैद व्यवस्था छ । त्यसैगरी सो दफा (२) मा अधिकतम दुईदेखि १० वर्षसम्म कैद र सोही दफाको (३) एक वर्षसम्म कैद वा दुई हजार रुपैयाँ जरिवाना वा दुवै सजाय हुने व्यवस्था छ।

यसरी हेर्दा घिमिरेको मोटरसाइकल दुर्घटना प्रकरणमा मुद्दा अभियोजन हुँदा सो दफाको ३ नम्बर लगाएर मुद्दा किनारा गरेको देखिएको छ। दुर्घटनाबाट सवारी ज्यान मुद्दाका अभियुक्त छुटेपछि न्यायालयबाट पीडित परिवारले न्याय नपाएको भन्दै मृतक बालककी आमा सरस्वती तिमल्सिनाले यसअघि नै भावविह्वल हुँदै सामाजिक सञ्जालमा भिडियो राखेपछि यस विषयले चर्चा पाएको थियो। 

मुद्दा फिर्ता लिने सहमति नगरेको र हाम्रो जानकारीविना अदालतबाट हाम्रो अनुपस्थित मै फैसला सुनाएपछि न्याय खोज्न कहाँ जाने भन्दै मृतक बालककी आमा सरस्वतीले दुःखेसो पोखेकी थिइन्।