प्राइम खबर संबाददाता | साउन २०, २०८० शनिबार
रौतहटमा केही दिनयता आँखा पाक्ने रोगको सङ्क्रमण फैलिन थालेको छ । गौर आँखा अस्पताल लगायतका आँखा उपचार केन्द्रमा दैनिक ४० जनाभन्दा बढी बिरामी आँखा जचाँउन आउने गरेका छन् । उपचारका लागि आउनेमध्ये ३० देखि ३५ जनामा आँखा पाक्ने समस्या भेटिएको छ ।
एक्कासी आँखा रातो हुने, पोल्ने, घाममा हेर्न नसक्ने समस्या लिएर आउने बिरामीको सङ्ख्या एक सातादेखि झन्डै दोब्बरले बढेको हिमालयन आँखा अस्पतालका डाक्टर शैलेश पौडेलले बताए । “दैनिक आँखा पाक्ने समस्या लिएर आउने बिरामीको सङ्ख्या बढिरहेको छ । समुदायस्तरमा यसको सङ्क्रमण फैलिसकेको छ”, उनले भने, “बालबालिका र युवामा यो समस्या बढी देखिएको छ ।”
आँखा पाक्ने रोग उपचारका लागि विभिन्न सरकारी, निजी अस्पताल तथा क्लिनिकमा बिरामीको चाप बढेको पौडेलले बताए । प्रदूषित हावा र मौसमका कारण यसको सङ्क्रमण फैलिरहेको चिकित्सकको भनाइ छ ।
यसबाट बच्न सङ्क्रमित व्यक्तिले प्रयोग गरेका रुमाल, कपडा, ओछ्यानलगायत सामान अरुले प्रयोग नगर्ने, पटकपटक हातमुख धुने, सङ्क्रमित व्यक्तिको नजिक नजाने, कालो चश्मा लगाउने, आँखा जाँच गराएर चिकित्सकको परामर्शअनुसार औषधिको प्रयोग गर्नुपर्ने डा. पौडेलले सुझाव दिए । “धुवाँधुलोबाट जोगिन सकियो भने पनि घरमा बसेर यो रोगबाट बच्न सकिन्छ”, उनले भने ।
हाल जिल्ला सदरमुकाम गौर, गरुडा र चन्द्रनिगाहपुर आसपासमा यसको सङ्क्रमण बढी देखिएको छ । विद्यालयका बालबालिकामा समेत यो रोग फैलिइसकेकाले सचेत रहन चिकित्सकले आग्रह गरेका छन् । जिल्लामा नेपाल नेत्र ज्योति संघ, गौर आँखा अस्पताल, ग्रान्डी आँखा अस्पताल, आँखा उपचार केन्द्र, हिमालयन आँखा अस्पताल, चन्द्रपुर हस्पिटल लगायतमा आँखा केन्द्र सञ्चालनमा छन् ।
पुस २७, २०८१ शनिबार
पुस २७, २०८१ शनिबार
पुस २५, २०८१ बिहिबार
पुस २५, २०८१ बिहिबार
मंसिर २९, २०८१ शनिबार
मंसिर ९, २०८१ आइतबार
