चन्द्रपुर नगरक्षेत्र भित्र संचालनमा रहेका अस्पतालहरुको दर्ता तथा मापदण्ड अनुगमनका लागि अनुगमन टोलीमा चन्द्रपुर नगरपालिकाका नगर प्रमुख संजय कुमार काफ्ले, वडा नं. ४ का वडा अध्यक्ष रवि राना मगर, चन्द्रनिगाहपुर अस्पतालका मेडिकल सुपरिेन्डेन्ट डा. अभिनन्दन श्रीवास्तव,स्वास्थ्य शाखा प्रमुख राजेश ठाकुर, मातृका चालिसे, ल्याब टेक्निसियन गजेन्द्र चौधरी लगायतका टोलीले सिभिल ह्युमन हस्पिटल प्रा.लि.को निरिक्षण गरेको छ । टोलीले अस्पताल संचालनका लागि आवश्यक पुर्वाधार तथा स्वास्थ्य सामाग्रीको समेत अनुगमन गरी नगरपालिकालाई जानकारी गराउने नगरप्रमुख काफ्लेले जानकारी दिएका छन्।

 तोकिएको मापदण्ड पुगेका अस्पताल संचालनका लागि नगरपालिकाले प्रक्रिया अगाडि बढाउने समेत उनले बताए । स्थानीय तहलाई १५ सैयासम्मको अस्पताल संचालन गर्न दिने कानुनी व्यवस्था भए अनुरुप दर्ता गरि अस्पताल संचालनको मापदण्ड पुगेको भनि नगरपालिकामा जानकारी गराएकोले सोही अुनरुप अनुगमन गरिएको नगर प्रमुख काफ्लेले जानकारी दिएका छन् । उक्त अस्पताल संचालकद्वय मुकेशकुमार गुप्ता र राजन कुमार साहले तोकिएको मापदण्ड पुयाएर नै अनुगमन गर्न समेत आग्रह गरेको जानकारी दिए । स्वास्थ्य निर्देशिका अनुसार सवै प्रक्रिया पुयाएर अस्पताल संचालन गरिएको सञ्चालक गुप्ताले बताए ।

यस अघि अस्पताल संचालनका लागि अस्थायी अनुमति पाएका अस्पताल हरुलाई त्यस्तो अस्थायी अनुमति दिने प्रावधान कतै नरहेको भन्दै मुख्यमन्त्री कार्यालयले विज्ञप्ति निकाल्दै नगरपालिकालाई सचेत गराएको थियो । सोही विज्ञप्ति पश्चात नगरपालिकाले दिएको अस्थायी अनुमति समेत बदर गरिएपछि निजी अस्पतालहरू समस्यामा परेका थिए ।

अनुगमनको क्रममा मधेश प्रदेशका मु्ख्यमन्त्री सतिश कुमार सिंहले मधेश प्रदेशमा रहेका अस्पतालहरुको अनुगमन गरेपछि मापदण्ड नपुगेका र दर्ता नभएका अस्पतालहरु तत्काल बन्द गर्न निर्देशन दिएका थिए । दर्ता नभएकोलाई तत्काल दर्ता प्रक्रियामा जान र मापदण्ड नपुगेका अस्पतालहरुलाई मापदण्ड पुर्याएर मात्र सञ्चालन गर्न ठाडो निर्देशन दिएपश्चात रौतहटमा रहेका अधिकांश अस्पतालहरु बन्द भएका थिए ।