भन्डाफोर कार्यक्रमका अभियन्ताहरुले रौतहटको वन तथा चुरे क्षेत्रलाई सखाप बनाउने काममा संबंधित निकायकै संलग्नता रहेको आरोप लगाउदै सो कार्य यथासिघ्र रोक्न माग गरेका छन् । 

अभियानका राष्ट्रिय संयोजक सुनिल यादवले गत दुई महिनामा पाँच हजारभन्दा बढी रुख फँडानी भएको आरोप लगाएका छन् । गरुडामा आयोजित विरोध जुलुस प्रदर्शनपछि कोणसभालाई सम्बोधन गर्दै राष्ट्रिय संयोजक यादवले रौतहटका डिएफओ, प्रदेशका वन मन्त्री र वन मन्त्रालयका सचिवको मिलोमतोमा रौतहटको वन सखाप भइरहेको गम्भीर दोषारोपण गरेका छन् ।
 
चन्द्रपुरको गैंडाटारमा पाँच बिगाहा क्षेत्रफलमा बन फँडानी गरेको र आफूले घटना सार्वजनिक गरेपछि ढाकछोप गर्न बैसाख महिनाको ४० डिग्री घाममा पनि वृक्षारोपण गरी हजारौँ बोटबिरुवाको हत्या गर्ने काम पनि गरेको आरोप यादवले लगाएका छन् । 

यादवले सिन्धुलीको मरिनबाट रौतहट चोचा र वृन्दावनको सब वन क्षेत्रमा मानिस ल्याएर बसाउने काम अवैध रुपमा वन प्रशासनको मिलोमतोमा भइरहेको आरोप पनि लगाएका छन् । यसै गरी डिएफओले आफ्नो छोरालाई नै वनको काठमा टेन्डर दिने गरेको आरोप लगाउँदै सप्तरीबाट वनमा लेबर ल्याएको कुराको पनि विरोध गरेका छन् । 

राष्ट्रिय संयोजक यादवले एक लाखभन्दा बढी क्युफिट काठको अवैध तरिकाले टेन्डर गरी करोडौँ रुपैयाँ भ्रष्टाचार गरेको र लाखौँ रुपैया राजस्व घाटा गराएको आरोप डिभिजन बन कार्यालय रौतहटका प्रमुख डिएफओ हेमन्त साहमाथि लगाएका छन् । 
यादवले मधेश प्रदेशका वन मन्त्री त्रिभुवन साह र वन मन्त्रालयका सचिव उद्धव घिमिरेको संलग्नतामा नै रौतहटको वन क्षेत्र फँडानी भइरहेको आरोप लगाउँदै स्वतन्त्र छानबिन र अनुगमनका लागि चुनौती दिएका छन् । 

अभियानका जिल्ला सचिव रामानन्द माझीले संचालन गरेको कार्यक्रममा राजेश  भन्डारी तथा अभियानी नन्दकिशोर रामले मन्तव्य व्यक्त गर्दै वन मन्त्री साह नै भूमाफिया भएको गम्भीर आरोप लगाएका छन् । 

कार्यक्रमको अध्यक्षता अभियानका रौतहट जिल्ला संयोजक अमिरी सहनीले गरेका थिए ।अभियानले गरूडा बजारको नगरपरिक्रमा गर्दै मुख्यमन्त्री सहित वनमन्त्री,सचिव,डिएफओको विरूद्वमा नारावाजी गरेका थिए । सो क्रममा उनीहरूको तस्बिर समेत जलाई अभियान्ताहरूले विरोध जनाएका थिए ।