रौतहट, चन्द्रपुर नगरपालिकाका विभिन्न वडाका जेष्ठ नागरिकहरू सामाजिक सुरक्षा भत्ता लिन बिहानैदेखि तातो घाममा लाइन बस्न बाध्य भएका छन्। नगरपालिकाका जनप्रतिनिधि र कर्मचारीको लापरबाही तथा मिलेमतोका कारण सेवाग्राहीहरूलाई असहज भएको जेष्ठ नागरिकहरूले गुनासो गरेका छन्।

---

भत्ता वितरणका लागि चन्द्रनिगाहपुरस्थित सेन्ट्रल फाइनान्स बैंक रोजिएपछि धेरै वृद्धवृद्धालाई भत्ता लिन निकै दुःख भएको छ। बिहान सबेरैदेखि लाइनमा बस्नुपरेको, घाम ताप्नुपरेको, पानी नपाउने, र घण्टौँ प्रतीक्षा गर्नुपरेको, फलामे भर्याङ चढ्न ओर्लन जस्ता समस्याहरूले जेष्ठ नागरिकहरूलाई हैरान बनाएको छ।

---

---

स्थानीयवासीहरूको भनाइअनुसार, बैंक रोजाइमा जनप्रतिनिधि र केही कर्मचारीबीच ‘सेटिङ’ भएको शंका गरिएको छ। उनीहरूका अनुसार, सहज र पहुँचमा रहेका अन्य बैंक वा वडामै वितरणको विकल्प हुँदाहुँदै पनि सेन्ट्रल फाइनान्स रोजिनुले सेवाग्राहीमाथि अन्याय भएको छ।

एक वृद्ध नागरिकले भने, “हामी बिहान ६ बजेदेखि लाइनमा छौँ, घाममा पोलिँदै बस्नु परेको छ। हातखुट्टा दुख्छ, तर कसैले वास्ता गरेको छैन।” अर्की वृद्धाले जोड्दै भनिन्, “वडामै वितरण हुन्थ्यो भने हामीजस्ता बुढाबुढीलाई यस्तो कष्ट सहनु पर्ने थिएन।”

---

---

यसैबीच, स्थानीयहरूले भत्ता वितरण प्रणाली वडास्तरमै लैजानुपर्ने माग गरेका छन्। उनीहरूले नगरपालिकाले जनप्रतिनिधि र कर्मचारीको मिलेमतो अन्त्य गरी पारदर्शी र सहज प्रणाली लागू गर्नुपर्ने बताइरहेका छन्।

नगरपालिकाका जिम्मेवार अधिकारीहरू भने यस विषयमा मौन छन्। यदि सुधारका पहल नभए, स्थानीय बासिन्दा र जेष्ठ नागरिकहरूले विरोध प्रदर्शन गर्ने चेतावनी दिएका छन्।

 

 

---

---