पार्टी स्रोतका अनुसार यसपटक क्रियाशील सदस्यता नवीकरण गर्नेको संख्या अघिल्लो अवधिको तुलनामा आधाभन्दा बढीले घटेको देखिएको छ। चन्द्रपुर नगरपालिकामा मात्र नभई जिल्लाका अधिकांश स्थानीय तहमा पनि सदस्यता नवीकरण अभियान अपेक्षाकृत कमजोर देखिएको बताइन्छ।

स्थानीय कार्यकर्ताहरूका अनुसार पार्टीभित्र बढ्दो गुटबन्दी, नेतृत्व तहमा देखिएको आन्तरिक विवाद तथा लामो समयदेखि सक्रिय कार्यकर्ताको उचित मूल्यांकन हुन नसक्दा धेरै कार्यकर्ता निराश बनेका छन्। उनीहरूका अनुसार पार्टीको संगठनात्मक गतिविधि कमजोर बन्दै जाँदा कार्यकर्तामा उत्साह समेत घटेको छ।

चन्द्रपुरका केही पुराना कांग्रेस कार्यकर्ताले नाम नखुलाउने सर्तमा भने, “वर्षौंदेखि पार्टीका लागि खटिएका कार्यकर्ताको भावना र योगदानको कदर हुन सकेन। केही सीमित व्यक्तिको वरिपरि मात्र निर्णय केन्द्रित हुँदा आम कार्यकर्ता निराश बनेका छन्। त्यसैले धेरैले यसपटक सदस्यता नवीकरणमा चासो देखाएका छैनन्।”

कार्यकर्ताहरूले पार्टीभित्रको गुटगत राजनीति र आन्तरिक शक्ति संघर्षले संगठनलाई कमजोर बनाएको आरोप लगाएका छन्। उनीहरूको भनाइमा नेतृत्व तहले कार्यकर्ताको भावना बुझ्न नसक्दा कांग्रेसप्रति जनस्तरमा समेत निराशा बढ्दै गएको छ।

यता केही कार्यकर्ताले वर्तमान सरकारले गरेका जनपक्षीय काम, सेवा प्रवाहमा देखिएको सुधार तथा नयाँ राजनीतिक शक्तिहरूको उदयका कारण पनि कांग्रेसप्रति आकर्षण घटेको बताएका छन्। विशेषगरी युवापुस्तामा वैकल्पिक राजनीतिक शक्तिप्रति बढ्दो रुचिले परम्परागत दलहरूलाई चुनौती थपिएको उनीहरूको विश्लेषण छ।

“पहिलेजस्तो अन्धाधुन्ध पार्टीको झोला बोकेर हिँड्ने अवस्था अब रहेन,” एक स्थानीय कार्यकर्ताले भने, “जनताले काम खोजिरहेका छन्। पार्टीभित्र सुधार र स्पष्ट नीति नआएसम्म कार्यकर्तालाई जोगाउन गाह्रो हुन्छ।”

राजनीतिक विश्लेषकहरूका अनुसार क्रियाशील सदस्यता नवीकरणमा आएको कमीले संगठनभित्रको असन्तुष्टि र घट्दो सक्रियतालाई संकेत गर्दछ। समयमै संगठन सुदृढीकरण, आन्तरिक एकता र कार्यकर्ताको मनोबल उकास्ने कदम चाल्न नसके आगामी निर्वाचनमा यसको प्रत्यक्ष प्रभाव पर्न सक्ने उनीहरूको भनाइ छ।

यद्यपि नेपाली कांग्रेसका स्थानीय नेताहरूले भने सदस्यता नवीकरणको प्रक्रिया अझै जारी रहेकाले अन्तिम तथ्यांक आएपछि मात्र वास्तविक अवस्था स्पष्ट हुने बताएका छन्। उनीहरूले पार्टीलाई थप सशक्त र एकताबद्ध बनाउन नेतृत्व प्रतिबद्ध रहेको दाबी गरेका छन्।

तर पछिल्लो सदस्यता अध्यावधिक अभियानमा देखिएको कमजोर सहभागिताले रौतहटमा कांग्रेस संगठनको वर्तमान अवस्थाबारे गम्भीर प्रश्न उठाएको छ। कार्यकर्ताबीच बढ्दो निराशा र वैकल्पिक राजनीतिक शक्तितर्फको आकर्षणले आगामी दिनमा जिल्लाको राजनीतिक समीकरणमा समेत प्रभाव पार्न सक्ने देखिन्छ।